Ola familias,
como ben sabedes estamos ás portas das reválidas que nos dicta a LOMCE, xa que as probas de 6º de EP realizaránse os días 11, 12 e de 13 e as de 3º de EP os días 24 e 25 de maio.
Dende a Anpa queremos informar que rexeitamos totalmente estas reválidas e solicitamos a derrogación da LOMCE, por iso invitamos ás familias con fillos nestes cursos que non os obriguen a realizar ditas probas, non os mandemos ó cole eses días. Entre todos mostremos á administración que están equivocados, que son unha aberración, que non sirven para nada e que non teñen o noso parabén.
O noso rexeitamento ven dado, entre outra cousas polos seguintes motivos:
- O establecemento da proba xeral en 3º e 6º de Primaria e as reválidas en 4º da ESO e en bacharelato, que son requisito imprescindíbel para conseguir os títulos correspondentes, pretende pór as maiores trabas posíbeis para a continuación dos estudos. Responde, exclusivamente, a unha concepción totalmente clasista e elitista da educación e contribúe a excluír o alumnado máis desfavorecido socialmente do dereito á educación, cando xa hoxe o ensino público carece de elementos compensatorios para facer efectivo e real o principio de igualdade de oportunidades.
- É unha aberración desde o punto de vista pedagóxico someter o alumnado a unha presión innecesaria, mediante probas que o van avaliar baixo estándares uniformizadores, sen considerar a educación como un proceso no que hai que considerar as circunstancias persoais e socioeconómicas e as capacidades e actitudes do alumnado.
- Limítanse a avaliar o ámbito lingüístico, matemático e científico-técnico, menosprezando a adquisición doutras competencias, destrezas e habilidades do campo artístico e musical refusando o ensino da nosa historia e medio natural, imprescindíbel para a formación integral do alumnado.
- Recentralizan o sistema educativo, dado que a elaboración e deseño das probas, os criterios de avaliación e os estándares de aprendizaxe avaliábeis serán fixados polo Ministerio de Educación, rexeitando así o estudo e coñecemento de todo o que nos conforma como pobo galego.
- Desprezan a avaliación continua e a opinión do equipo docente, cando ninguén mellor que o titor ou titora ou o equipo docente para coñecer as carencias, potencialidades, habilidades e capacidades do alumnado, así como dos medios, recursos e apoios necesarios para mellorar a aprendizaxe e o rendemento escolar.
- Subestiman e desconfían do traballo do profesorado que estará sometido e totalmente condicionado a orientar o seu traballo docente a preparar o alumnado para a obtención da mellor nota na avaliación final, marxinando outros aspectos educativos fundamentais para acadar unha formación o máis completa posíbel.
- Responden á pretensión de conformar clasificacións de centros, segundo os resultados destas avaliacións e sen ter en conta as características do alumnado e os servizos cos que conta o centro, co obxecto de ir configurando unha rede elitista que contará con máis medios e recursos.
- Pretenden ir afirmando un sistema educativo competitivo, clasista e segregador que excluirá os sectores máis desfavorecidos da educación e asentará unha estrutura curricular ao servizo do neoliberalismo.
Mandaremos xunto a circular informativa unha carta de rexeitamento. Por favor, as familias que non estedes a favor das reválidas, firmade a carta e devolvédea ó centro, remitiránse todas á consellería.
Si queredes unha información máis completa e detallada, premede nos seguintes enlaces:
